Q&A’s tokante e kandela na lèntfel di Selibon

Durante e kandela akí tin dioksina a bini liber. Banda di dioksina e Servisio di Aksidente Ambiental (Milieuongevallen Dienst – MOD) ta investigá tambe presensia di PAK  (Polycyclische Aromatische Koolwaterstoffen – hidrógeno di karbon aromátiko polisíkliko) i otro metalnan pisá. E resultadonan di e investigashon akí no ta konosí ainda. Asina ku e resultadonan drenta, nos lo komuniká tokante esaki i kompletá e sekshon di Q&A akí.

Dioksina ta un nòmber kolektivo pa algun shen diferente supstansia, di kua 17 ta di importansia. Dioksina ta surgi entre otro pa medio di kandela (di mondi), volkan, kimamentu di shushi i tráfiko riba kaminda. Durante e kandela di 5 di novèmber na lèntfel hopi shushi a kima, di manera ku a surgi dioksina i nan a plama den bisindario. E bisindario den kua a midi  konsentrashon mas haltu, bo por mira riba e mapa akí.

Nò, esaki ta dependé di e tipo di material ku ta na kandela. Mester tin produkto ku ta kontené kloro, manera PVC (un tipo di plèstik), ku ta na kandela. Banda di esaki e kantidat di dioksina i e tiponan di dioksina ku ta bini liber durante un kandela ta dependé di e tipo di material i  e temperatura ku e kandela ta kimando kuné. Na un temperatura sumamente haltu (riba 800°C) dioksina asta por deskomponé atrobe.

No ta posibel pa mira dioksina. Dioksina no tin holó, ni sabor, ni koló tampoko.

Dioksina ta akumulá den tehido di vèt di bestia. Hende ta ingerí dioksina prinsipalmente pa medio di kome vèt di bestia, karni, webu, piská (vèt) i bebe lechi. Kueru di hende no ta apsorbá dioksina i den un forma hopi limitá esaki por tuma lugá via respirashon.

Ora bo ingerí dioksina durante un tempu largu, esaki por sòru pa un sistema inmunitario ku no ta funshoná bon, fertilidat redusí i kanser. Ora diariamente bo ingerí un nivel abou, esaki finalmente por kondusí na nivelnan mas haltu den bo kurpa i ku esaki efektonan dañino. E ora ei ta trata prinsipalmente di ingerishon èkstra di dioksina ku por ta dañino via kuminda riba un término mas largu.

Dioksina por a resultá riba bèrdura i fruta. Pa e motibu akí ta deskonsehá pa kome bèrdura i fruta ku no ta labá for di e área di impakto (wak e mapa). Si bo a kome bèrdura òf fruta for di e área akí, e ora ei e riesgo pa salú lo ta chikitu ainda. Esaki ta pasobra loke bo a ingerí a tuma lugá den un tempu kòrtiku. Tambe t’asina ku bo ta kaska sierto bèrdura i fruta. Pa medio di kaska esakinan no tin dioksina mas den i riba bèrdura i fruta, pasobra e mata no ta apsorbá dioksina. Kaska e produktonan akí ta mas mihó ku laba nan.

Bèrdura i fruta ku a krese despues di e kandela, bo por kome atrobe. Semper ta bon pa laba bèrdura i fruta promé ku bo kome nan.

Galiña i kabritu ku ta kana pafó den e área di impakto (wak e mapa) por a ingerí dioksina. Galiña i kabritu ta kome kos djabou i mata riba kua dioksina por a resultá. E dioksina akí ta resultá den e webunan i den e karni. Si bo a kome webu i/òf karni for di e área ei, posibelmente bo a ingerí algu mas di dioksina. Esaki tabata un ingerishon èkstra durante un tempu kòrtiku, di manera ku e riesgo pa salú ta chikitu. E konseho ta pa por lo pronto no kome webu i karni di bestia ku ta kana den e área di impakto. Laga galiña buska kuminda riba suela limpi. Di e manera ei dioksina nobo no ta resultá den e webunan.

Pafó di e área di evakuashon tambe hendenan tabatin keho di huma. Den huma tin hopi supstansia peligroso, dioksina tambe. Dioksina apénas ta keda apsorbá pa medio di respirashon. Durante e kandela nan a duna instrukshon tokante kon bo por eliminá partíkula di chèmènè i mancha pretu, i kiko bo tin ku hasi ku bèrdura i fruta. Si bo a sigui e instrukshonnan akí, bo no a keda eksponé na supstansianan peligroso. Si esaki no ta kaso, ainda bo por sigui e instrukshonnan proponé pa eksposishon redusí.

Pa motibu ku tin hopi diferente dioksina, ora di midi semper ta wak e tiponan di dioksina ku a bini liber. E dioksina ku MOD (e Servisio di Aksidente Ambiental di RIVM) a haña na Boneiru, ta e mesun tipo di dioksina ku ta bini liber den kaso di kimamentu. E dioksina akí pues a bini liber pa medio di kimamentu, pero no por hasi distinshon entre e kandela di 5 di novèmber i e kandelanan anterior. Te ku 2 kilometer for di e kandela, e resultadonan di midimentu ta konsiderabelmente haltu. Pa e motibu akí probablemente ta e kandela di 5 di novèmber tabata e fuente. Den e área di 2 pa 4 kilometer for di e sitio di e kandela, ketu bai e resultadonan di midimentu ta mas haltu ku e norma, pero no hopi mas haltu ku esaki. Esaki ta nifiká tambe ku den e área akí no ta sigur kiko ta e fuente di esaki. Por ta e kandela, pero e por a surgi debí na otro aktividat den e área tambe.

Un kandela ta un situashon agudo, kaminda mesora akshon ta nesesario. E ora ei no tin tempu pa hasi investigashon di e zonanan di plamamentu na Hulanda Karibense. Pa e motibu akí a apliká e zona di 1 kilometer di Hulanda Oropeo. Awor ta resultá ku e nivelnan di depósito di dioksina te 2 kilometer for di e kandela ta konsiderabelmente mas haltu. E diferensia den distansia por tin diferente faktor komo motibu, manera bientu mas duru (for di pariba), haltura i magnitut di e kandela, e kantidat di plèstik ku a kima òf kandela na aire liber. Den e área di 2 pa 4 kilometer for di e kandela ainda e dioksina ta mas haltu ku e norma, pero no hopi mas haltu ku esaki. Esaki ta nifiká ku den e área akí no ta sigur kiko ta e fuente.

Por hasi uso di evakuashon den kaso di un situashon agudo. Semper mester pone evakuashon bon den balansa, pa motibu ku evakuashon mes tambe tin riesgo pa salú. Durante e kandela na luna di novèmber a evakuá hende dentro di un rayo di 1 kilometer, pa protehá nan kontra e efektonan agudo di huma. Ora e kandela kaba kima, no ta posibel mas pa midi supstansianan peligroso den e huma. E investigashon di MOD ta identifiká kua ta e supstansianan ku a baha for di den e huma; esaki nan ta yama deposishon. Eksposishon na supstansianan peligroso den deposishon por tin efekto riba salú, si un hende keda eksponé durante tempu mas largu na esaki. E investigashon akí no tin influensia riba e área di evakuashon. E investigashon por tin influensia sí riba e konsehonan pa den un sierto área no kome bèrdura, fruta, webu òf karni.

Semper ta importante pa inhalá ménos huma posibel. Huma semper ta venenoso. Pero si esaki pasa un biaha tòg, mayoria biaha e ta keda sin konsekuensia grave riba término largu. E efektonan ku huma tin riba bo salú, ta dependé prinsipalmente di e kantidat di huma ku bo a inhalá, e durashon i e frekuensia di e eksposishon. Si despues di a inhalá huma bo tin molèster permanente di bo vianan respiratorio, un garganta iritá, wowo ku ta pika òf keho di doló di kabes, e ora ei pa ta mas sigur bo por tuma kontakto ku bo dòkter di kas.

• Salubridat Públiko ta duna informashon na siudadanonan tokante e efektonan di kandela i huma pa medio di informashon riba e wèpsait akí.
• Salubridat Públiko ta duna konseho na gobièrnu i gezaghèber, i ta traha huntu ku e otro instansianan di gobièrnu i institutonan di salú.
• Salubridat Públiko ta sostené organisashonnan di kuido ku dunamentu di informashon na siudadanonan.
• Salubridat Públiko ta kolektá informashon tokante e efektonan ku e kandela akí tin riba salú di siudadanonan. Salubridat Públiko ta sinkronisá pa loke ta trata kontenido ku konseheronan médiko di supstansianan peligroso i ku ekspertonan médiko di medio ambiente di pafó di Boneiru.
• Via señalnan for di organisashonnan di kuido, Salubridat Públiko ta mantené un bista general di e kehonan di salú di hendenan, debí na e kandela akí. Den kolaborashon ku hòspital i e dòkternan di kas Salubridat Públiko ta akumulá dato tokante e efektonan.

• Salubridat Públiko no ta un dunadó di kuido i pues e no ta e punto di kontakto pa habitantenan ku tin keho.
• Salubridat Públiko no ta duna un indikashon médiko, remedi òf tratamentu na siudadanonan individual.
• Hendenan na Boneiru ku tin mester di tratamentu médiko òf konseho individual di salú, ta pidi esaki serka nan dòkter di kas òf den anochi i den wikènt na e pòst di dòkternan di kas.