E kandela na lèntfel di Selibon ta kompletamente pagá. Brantwer tin e situashon bou di kontròl i ta ta sigui monitoriá e lugá pa evitá ku kandela ta bolbe surgi. Entidat públiko Boneiru, EPB, ta gradisí tur servisio di ayudo i instansia konserní pa nan trabou i kooperashon den kombatimentu di e kandela.
Keho di salú i konseho
Bo tin keho serio di salú? Tuma e ora ei dirèkt kontakto ku warda di dòkter di kas (Huisartsenpost HAP).
Banda di esei Mental Health Caribbean tin un ora di konsulta spesial pa hende ku tin nesesidat di sosten mental despues di e kandela.
Ta konsehá hende bibá den besindario di lèntfel ku nan a evakuá anteriormente pa nan ventilá nan kas bon promé ku nan bai kas bèk mañan.
Kooperashon den Triángulo di Seguridat
Kombatimentu di e kandela i e moda di atendé ku e konsekuensianan di dje ta un resultado konhunto di e kooperashon intensivo entre vários kolumna di ESF entre otro brantwer, polis, servisio di salubridat, koordinashon di krísis i Selibon. Danki na e enfoke konhunto akí a kontrolá i a limitá e impakto pa komunidat mas tantu posibel.
Triángulo di Seguridat ku ta konsistí di gezaghèber. Ministeri Públiko i Kuerpo di Polis Hulanda Karibense (KPCN), a bini huntu pa papia di e investigashon ku ta tumando lugá. Kuerpo Polisial Hulanda Karibense ta investigá e kandela. Personanan ku a wak algu òf tin informashon, por mèldu esei via e liña anónimo di tep #9310.
Entidat públiko Boneiru a tuma huntu ku e instansianan relevante di gobièrnu e pasonan nesesario pa atendé mas mihó posibel ku e situashon i garantisá seguridat di poblashon.
Mas informashon i último notisia
Pa mas informashon i último notisia por bai na wèpsait ofisial di krísis: www.bonairecrisis.com. Tene banda di esei nos kanalnan ofisial di komunikashon na bista pa mas notisia.