Kralendijk – For di djasabra 2 di aprel 2022 hendenan di 60 aña bai ariba por pasa e di dos angua di buster sin sita na Kompleho Deportivo Jorge Nicolaas. E di dos angua di buster ta nesesario pa motibu ku e protekshon di e promé angua di buster ta bira ménos despues di mas òf ménos tres luna. Último tempu e kantidat di kontagio ku corona ta oumentá. P’esei ta bon pa hendenan di 60 aña bai ariba pasa e di dos angua di buster.
E di dos angua di buster ta sòru pa alsa protekshon di e anguanan kontra corona ku hende a pasa anteriormente. Na Boneiru tin bastante hende ku por ehèmpel malesa di suku, sobrepeso i preshon haltu. Pa nan ta importante pa nan pasa e di dos angua di buster. Esaki pasobra si nan pega ku e vírùs di corona, nan tin hopi chèns pa haña keho grave. Pa hendenan ku tin malesa di pulmon òf personanan ku ta biba den kas huntu ku un persona vulnerabel, tambe ta importante pa pasa e di dos angua di buster.
Hendenan di 60 aña bai ariba ku ke pasa e di dos angua di buster por hasi esaki por lo ménos tres luna despues di e promé angua di buster. Si nan tabatin corona, nan por pasa e di dos angua di buster tres luna despues ku nan a pega ku e vírùs.
Bo tin pregunta tokante e di dos angua di buster pa hende di 60 aña bai ariba? E ora ei yama e number grátis 0800 0900. Riba djasabra 2, 9, 16 i 23 di aprel 2022 suidadanonan por pasa e anguanan kontra corona, e promé òf e di dos angua di buster sin sita na Kompleho Deportivo Jorge Nicolaas na Playa.