Kralendijk – For di 14 di mart 2022 ta publiká e kantidat di kontagio ku e vírùs di corona ún
biaha den siman riba djaluna. Ta un resúmen di e siman promé. E siman aki no ta publiká e
sifranan di kontagio diariamente mas, ta publiká e resúmen di e siman akí otro siman. Na
Boneiru e kantidat di kontagio ku e vírùs di corona a baha konsiderablemente. Den kaso di
kantidat abou, un resúmen semanal ta duna un mihó bista di kontagionan, asina e
departamento di Salubridat Públiko ta laga sa.
Debí na e kantidat abou di kontagio, for di 4 di mart 2022 a eliminá tur medida di corona.
Den e fase nobo akí ta keda importante si pa sigui e reglanan básiko. Ta keda importante pa
laba man regularmente. Ora ta tosa òf nister, mester tapa boka òf nanishi ku e parti paden di
èlebog. Ta posibel tambe pa usa un lensu di papel i benta esaki afó mesora despues di uso.
Mester laga bientu pasa den espasionan paden i ofisina kaminda hende ta bini huntu.
Den e tempu akí ta importante pa tene èkstra kuenta ku hendenan vulnerabel. Ke men ku
grandinan i otro hende ku tin problema médiko serio. Si hendennan vulnerabel kontagiá ku e
vírùs di corona, nan por bira hopi malu. E mihó kos ta pa bishitantenan di hende vulnerabel
hasi un tèst propio promé ku nan bai di bishita. Ta konsehabel tambe pa bisti un tapaboka
durante e bishita.
Bo tin keho? Keda kas i yama e ora ei 0800 0800 i laga nan tèst bo gratuitamente. Bo por
hasi un tèst propio tambe na kas. Si e tèst propio ta positivo, pa siguridat bo mester hasi un
tèst di PCR den e kaya di tèst di Salubridat Públiko. E ora ei bo tin sigur si bo ta kontagiá.
Bo no a pasa e anguanan di corona òf e angua di buster ainda? Den mart bo por pasa e
angua di corona òf e angua di buster tur djasabra di 09:00 -14:00 or sin sita na Kompleho
Deportivo Jorge Nicolaas.